你不安好心,我點會安心

0
49
梁振英刑事恐嚇《立場新聞》該當何罪?

港共政權以防控疫情為名強推「不安好心」嘅「安心出行」,要求市民喺手機安裝有關「應用程式」(APP),宣布自今(二〇二一)年十一月一日開始,出入政府單位、圖書館、體育館、游泳池、市場、醫院、司法機構等地,都必須掃描「安心出行」QRCode;但係,如果入公廁就唔使掃喎。人們不禁要問:緣何衛生狀況多數惡劣嘅公廁會係百毒不侵呢?
舊年十一月推出「安心出行」時,「賊婆」大大聲話「不存在監控功能、不會侵害使用者隱私」,呢句說話出自一位民意支持度幾乎零分嘅特首,試問香港人又點會唔從相反嘅角度去理解呢?即是「賊婆」話冇咁就係有!事隔一年,喺疫情稍見和緩嘅今日,竟然夾硬嚟,要搞強制行動咁話,真係唔想講粗口都唔得!
你有政策,我有對策。既然擔心「安心出行」應用程式可以過度蒐集個人資料,不但侵犯私隱而且可以掌握市民嘅行蹤。所以,好多人就走去買平價手機來應對,避免喺日常使用嘅手機安裝有關應用程式。旺角、深水埗電子產品商場好多店鋪,深諳以客為尊之道,反應快到不得了,立即大量推出一千蚊以下嘅平價手機,而且用到「安心之選」、「必買備用手機」及「包裝安心出行」(即係包埋安裝)做宣傳口號促銷,由於有好多人搶購,真係近年難得一見嘅「其門如市」。不過,毓民有啲擔心,「賊婆」會唔會老羞成怒,癲起上嚟,指控旺角先達廣場或者深水埗黃金商場啲賣手機店鋪,涉嫌觸犯《港區國安法》「煽動顛覆國家政權罪」呢?
有報道話搶購平價手機嘅市民年齡廣泛,老少都有。有受訪嘅市民表示「唔想被追蹤」,所以唔會喺用開嘅手機安裝「安心出行」APP,因此購買平價手機「應酬」下政府;更加有市民話唔會購買中國品牌手機。所謂人言為信,中港政府乜都有就係無恥同無信,咁就梗係講乜都冇人信啦!「大家講個信字」,絕不適用於暴政一家親之中港政府也。
講到呢度令我諗起一句頂一萬句嘅治國金句「民無信不立」。毓民不妨在此上一堂「說文解字」:「民無信不立」典出《論語》〈顏淵七〉。「子貢問政。子曰:『足食。足兵。民信之矣。』子貢曰:『必不得已而去,於斯三者何先?』曰:『去兵。』子貢曰:『必不得已而去,於斯二者何先?』曰:『去食。自古皆有死,民無信不立。』」譯成廣東話就係:「子貢請教孔子為政之道。孔子答:『讓人民食得飽,讓軍隊兵源充足、讓政府不失信於人民。」子貢又問:『如果不得已要剔除其中一項,先剔除邊一項呢?』孔子答:『剔除軍隊兵源充足呢一項。』子貢又問:『如果不得已又要剔除一項,剩下兩項如何取捨?』孔子答:『剔除讓人民食得飽呢一項。因為自古以來都有人會因為打仗同埋冇得食而死,但係如果人民唔相信政府,咁樣嘅政府、咁樣嘅國家,一定會仆街!』」
兩年多以來,港共政權種種打壓人權嘅倒行逆施,香港人恨在心頭,不同宗教信仰嘅人會用唔同嘅方式,日夜咒詛以「賊婆」為首嘅一眾賣港奸賊,唔好咁快死,因為「善終」係便宜咗佢哋。,所以,大家用個膝頭哥諗吓都知道,既然大部份嘅香港人,都對港共政權恨之刺骨,又點會相信「安心出行」冇問題呢?
2021 Nov 3 癲狗編輯室
/黃毓民

b

The post 你不安好心,我點會安心 appeared first on 癲狗日報.